¹ Göylər və yer, oradakı hər şey beləcə tamamlandı. ² Tanrı yeddinci günə qədər gördüyü işləri qurtardı və yeddinci gün gördüyü işlərdən ayrılıb istirahət etdi. ³ Tanrı yeddinci günə bərəkət verdi və onu təqdis etdi, çünki gördüyü bütün yaratma işini qurtarıb həmin gün istirahət etdi. ⁴ Rəbb Tanrıın göyləri və yeri yaratmasının hekayəti belədir: Rəbb Tanrı göyləri və yeri yaradanda ⁵ yer üzündə heç bir bitki yox idi, heç bir çöl otu da bitmirdi, çünki Rəbb Tanrı yer üzünə hələ yağış göndərməmişdi və torpağı becərən insan da yaranmamışdı. ⁶ Amma yerdən su çıxırdı və bütün torpağı sulayırdı. ⁷ Rəbb Tanrı yerin torpağından insanı düzəltdi və onun burnuna həyat nəfəsi üfürdü. Beləcə insan canlı varlıq oldu. ⁸ Sonra Rəbb Tanrı şərqdə yerləşən Edendə bir bağ saldı və düzəltdiyi insanı orada yerləşdirdi. ⁹ Rəbb Tanrı torpaqda gözəl görünüşlü və yemək üçün şirin meyvəli cürbəcür ağaclar yetirdi. O həmçinin bağın ortasında həyat ağacını və xeyirlə şəri bilmə ağacını bitirdi. ¹⁰ Bağı suvarmaq üçün Edendən bir çay çıxırdı, oradan isə dörd qola bölünürdü.
 ¹¹ Onlardan birinin adı Pişondur. O bütün Xavila ölkəsini dolanaraq axır. Orada qızıl çıxır. ¹² Bu ölkənin qızılı yaxşıdır. Burada həm də ətirli qatran və damarlı əqiq var.
 ¹³ İkinci çayın adı Gixondur. O, Kuş ölkəsini dolanaraq axır. ¹⁴ Üçüncü çayın adı Dəclədir. O, Aşşur ölkəsinin şərqindən axır. Dördüncü çay Fəratdır. ¹⁵ Rəbb Tanrı insanı götürüb Eden bağına qoydu ki, oranı becərsin və saxlasın. ¹⁶ Rəbb Tanrı insana əmr edib dedi: «Bağdakı bütün ağacların bəhrəsindən istəyəndə yeyə bilərsən. ¹⁷ Ancaq xeyirlə şəri bilmə ağacının meyvəsindən yemə, çünki ondan yeyən gün hökmən öləcəksən».

 ¹⁸ Rəbb Tanrı yenə dedi: «İnsanın tək olması yaxşı deyil, Mən ona münasib olan bir köməkçi yaradacağam».

 ¹⁹ Rəbb Tanrı bütün çöl heyvanlarını və göydəki bütün quşları torpaqdan düzəltdi. Sonra onları insanın yanına gətirdi ki, onun bunları necə adlandıracağını görsün. İnsan hər heyvana hansı adı qoydusa, o cür də adlandı.

 ²⁰ İnsan bütün ev heyvanlarına, göydəki quşlara və bütün çöl heyvanlarına ad verdi, amma insana münasib olan bir köməkçi tapılmadı. ²¹ O zaman Rəbb Tanrı insana dərin yuxu göndərdi və o yuxuya getdi. Onda Rəbb Tanrı onun qabırğasının birini götürdü və yerini ətlə örtdü. ²² Rəbb Tanrı insandan götürdüyü qabırğadan qadını düzəltdi və onu insanın yanına gətirdi. ²³ İnsan dedi: «Bax, nəhayət, bunun Sümüyü mənim sümüyümdən, Bədəni mənim bədənimdəndir. Adına “qadın” deyiləcək, Çünki o, kişidən
götürülüb». ²⁴ Buna görə də kişi öz ata-anasını tərk edib arvadına qovuşacaq və onlar bir bədən olacaq. ²⁵ Adəm və arvadı – ikisi də çılpaq idi, ancaq bundan utanmırdılar.

Sorular:

• Tanrı haqqında nə öyrənirik?

• İnsanın yaradılması və onun vəzifələri haqqında nə öyrənirik?

• Tanrı qadınla kişi arasındakı münasibətin necə olmasını istəyir?

• Tətbiq etmək istədiyiniz prinsiplə rastlaşmısınızmı?

• Sizə açılanları kiminlə bölüşəcəksiniz?