¹ Başlanğıcda Tanrı göyləri və yeri yaratdı. ² Yer quruluşsuz və boş idi. Dərin sular üzərində qaranlıq var idi. Tanrının Ruhu suların üzərində dolaşırdı. ³ Tanrı dedi: «Qoy işıq olsun». İşıq oldu. ⁴ Tanrı gördü ki, işıq yaxşıdır. Sonra O, işığı qaranlıqdan ayırdı.
 ⁵ Tanrı işığı «gündüz», qaranlığı isə «gecə» adlandırdı. Axşam oldu, səhər açıldı; bu, birinci gün idi. ⁶ Sonra Tanrı dedi: «Qoy suların arasında bir qübbə olsun və suları birbirindən ayırsın». ⁷ Tanrı qübbəni düzəltdi və qübbənin altındakı suları onun üstündəki sulardan ayırdı. Belə də oldu. ⁸ Tanrı qübbəni «göy» adlandırdı. Axşam oldu, səhər açıldı; bu, ikinci gün idi. ⁹ Sonra Tanrı dedi: «Qoy göyün altındakı sular bir yerə yığılsınki, quru görünsün». Belə də oldu. ¹⁰ Tanrı qurunu «yer», su yığınlarını isə «dənizlər» adlandırdı. Tanrı gördü ki, bu, yaxşıdır. ¹¹ Sonra Tanrı dedi: «Qoy yer üzü bitkilər yetirsin: toxumlar bitirən ot-ələf və torpaqda hər növ bəhərli ağaclar yetişsin. Ağaclar meyvə gətirsin və toxumları meyvələrinin içində olsun». Belə də oldu. ¹² Yer üzü bitkilər yetirdi: hər növ toxum bitirən ot-ələf və hər növ ağac yetişdi. Ağaclar meyvə gətirirdi və toxumları meyvələrinin içində idi. Tanrı gördü ki, bu, yaxşıdır. ¹³ Axşam oldu, səhər açıldı; bu, üçüncü gün idi. ¹⁴ Sonra Tanrı dedi: «Qoy göy qübbəsində gecəni gündüzdən ayıran çıraqlar olsun. Onlar işarələri, fəsilləri və günlərlə illəri göstərsin. ¹⁵ Qoy onlar göy qübbəsində çıraq olub, yer üzünə işıq saçsın». Belə də oldu. ¹⁶ Tanrı iki böyük çıraq düzəltdi: gündüzü idarə etmək üçün böyük çıraq, gecəni idarə etmək üçün kiçik çıraq. O həmçinin ulduzları düzəltdi. ¹⁷ Tanrı onları göy qübbəsinə qoydu ki, yer üzünə işıq saçsın, ¹⁸ gündüzü və gecəni idarə etsin, işığı qaranlıqdan ayırsın. Tanrı gördü ki, bu, yaxşıdır. ¹⁹ Axşam oldu, səhər açıldı; bu, dördüncü gün idi. ²⁰ Sonra Tanrı dedi: «Qoy sular çoxlu canlı məxluqlarla qaynaşsın, yer üstündəki göy qübbəsində quşlar uçsun».
 ²¹ Tanrı nəhəng su əjdahalarını və suda qaynaşan hər növ bütün sürünən canlı məxluqları, həmçinin hər növ bütün qanadlı quşları yaratdı. Tanrı gördü ki, bu, yaxşıdır. ²² Tanrı onlara bərəkət verərək dedi: «Törəyib çoxalın və dənizlərdəki suları doldurun, quşlar da yer üzündə çoxalsın». ²³ Axşam oldu, səhər açıldı; bu, beşinci gün idi. ²⁴ Sonra Tanrı dedi: «Qoy yer üzü hər növ canlı məxluqlar – hər növ ev heyvanları, sürünən canlılar və çöl heyvanları əmələ gətirsin». Belə də oldu. ²⁵ Tanrı hər növ çöl heyvanlarını, hər növ ev heyvanlarını və yerdə sürünən bütün canlıları yaratdı. Tanrı gördü ki, bu, yaxşıdır. ²⁶  Sonra Tanrı dedi: «Öz surətimizə və bənzərimizə görə insanı yaradaq. Qoy o, dənizdəki
heyvanlara, göydəki quşlara, yerdəki heyvanlara, bütün yer üzünə və yerdə sürünən canlıların hamısına hökmranlıq etsin». ²⁷ Tanrı insanı Öz surətində yaratdı, Tanrının surətində yaratdı, onları kişi və qadın olaraq yaratdı. ²⁸ Tanrı onlara xeyir-dua verərək dedi: «Törəyib çoxalın və yer üzünü bürüyüb ona sahib olun: dənizdəki heyvanlar, göydəki quşlar, yerdə sürünən bütün canlılar üzərində hökmranlıq edin». ²⁹ Tanrı dedi: «Budur, yer üzündə toxum verən bütün ot-ələfi və meyvələrində toxumu olan bütün ağacların bəhrələrini sizə verirəm ki, qidalanasınız. ³⁰ Yerdəki heyvanların, göydəki quşların və yerdə sürünən canlıların hamısına – nəfəsi olan bütün canlılara isə yem olmaq üçün bütün yaşıl otları verirəm». Belə də oldu. ³¹ Tanrı gördü ki, yaratdığı hər şey çox yaxşıdır. Axşam oldu, səhər açıldı; bu, altıncı gün idi.

Sorular:

• Tanrı haqqında nə öyrənirik?

• İnsan haqqında nə öyrənirik?