Məzmur 23

 ¹ Rəbb mənim çobanımdır, möhtac olmaram.

 ² O məni yaşıl çəmənlərdə dincəldir,

Sakit axan sular kənarında gəzdirir.

 ³ Məni yenə də canlandırır,

İsmi şərəfinə salehlik yolları ilə aparır.

 ⁴ Ölüm kölgəsinin dərəsində gəzsəm belə,

Şərdən qorxmaram, çünki Sən mənimləsən,

Sənin əsan, Sənin dəyənəyin mənə təsəlli verir.

 ⁵ Düşmənlərimin qarşısında

Mənim üçün süfrə açırsan,

Başıma ətirli yağ çəkirsən,

Ağzınadək camımı doldurursan.

 ⁶ Bəli, bütün həyatım boyu

Yaxşılıq, məhəbbət məni izləyir.

Bütün ömrüm boyu

Rəbbin evində yaşayacağam!

Məzmur 27

 ¹ Rəbbdir nurum, qurtuluşum!

Mən kimdən qorxum?

Rəbdir ömrümün qalası,

Mən kimdən vahimələnim?

 ² Ətimi yemək üçün hücum edən şər adamlar –

Yağılarım, düşmənlərim büdrəyərək yıxılarlar.

 ³ Bir ordu qarşımda düzülsə belə, ürəyim qorxmaz,

Mənimlə döyüşsələr də, arxayınam.

 ⁴ Rəbdən bir arzum, bir istəyim var:

Bütün ömrüm boyu Rəbbin evində yaşayım,

Məbədində Rəbbin camalına baxım,

Ona pərəstiş edim.

 ⁵ Dar gündə məni çardağında gizlər,

Çadırının örtüyü ilə örtər,

Qaya başındakı yüksək yerə gətirər.

 ⁶ İndi ətrafımdakı düşmənlərimin üzərində

Qələbələr çalacağam,

Rəbbin çadırında şənlik qurub qurbanlar kəsəcəyəm,

Onu ilahilərlə tərənnüm edəcəyəm.

 ⁷ Ya Rəbb, dinlə, Səni çağırıram,

Lütf edib mənə cavab ver.

 ⁸ Sən dedin: «Üzümü axtarın».

Ya Rəbb, mən Sənin üzünü axtarıram.

 ⁹ Üzünü məndən gizlətmə,

Qulunu qəzəblə qovma.

Mənə Sən kömək etmisən,

Məni atma, tərk etmə,

Ey məni qurtaran Tanrım!

 ¹⁰ Ata-anam məni atsa belə,

Rəbb məni qəbul edər.

 ¹¹ Ya Rəbb, yolunu mənə öyrət,

Düşmənlərimdən ötrü mənə düz yolda rəhbərlik et.

 ¹² Məni düşmənlərin əlinə salma,

Çünki yalançı şahidlər, zorakılar əleyhimə qalxdılar.

 ¹³ Rəbbin xeyirxahlığını dirilər arasında görəcəyəm,

Buna şübhəm yoxdur.

 ¹⁴ Rəbbə ümid bağla!

Möhkəm və cəsarətli ol!

Rəbbə ümid bağla!

Sorular:

• Davudun Tanrıyla münasibəti haqqında nə başa düşə bilərik?

• Davudun bu sözlərindən necə zövq alırsan?

• Zəburu oxuyanda ürəyində hansı hisslər keçirdi?

• Davudun sözlərindən hansı nümunələri götürürsən?

• Sənə açılanları kiminlə bölüşmək istərdin?