Matta 3:1-17

 ¹ O günlərdə Vəftizçi Yəhya Yəhudeya çölündə vəz edərək meydana çıxdı. ² O belə deyirdi: «Tövbə edin! Çünki Səmavi Padşahlıq yaxınlaşıb». ³ Bu o adamdır ki, Yeşaya peyğəmbər onun barəsində demişdi: «Səhrada nida edənin səsi gəlir:

“Rəbbin yolunu hazırlayın, Onun keçəcəyi yerləri düz edin”».

 ⁴ Yəhya dəvə yunundan paltar geymiş, belinə dəri qurşaq bağlamışdı, yeməyi çəyirtkə və çöl balı idi. ⁵ Yerusəlim sakinləri, bütün Yəhudeya diyarından olanlar və İordan ətrafında yaşayanlar Yəhyanın yanına gəlirdi. ⁶ Onlar günahlarını etiraf edərək onun tərəfindən İordan çayında vəftiz olunurdu. ⁷ Fariseylər və sadukeylərdən çoxunun vəftiz olmaq üçün onun yanına gəldiyini görən Yəhya onlara belə dedi: «Ey gürzələr nəsli! Üzərinizə gələn qəzəbdən canınızı qurtarmağı sizin beyninizə kim yeridib? ⁸ İndi isə tövbəyə layiq bəhrə verin. ⁹ Ürəyinizdə “atamız İbrahimdir” deyə düşünməyin. Mən sizə deyirəm: Tanrı bu daşlardan İbrahimə övlad yaratmağa qadirdir. ¹⁰ Artıq balta ağacların dibində yatır. Beləliklə, yaxşı bəhrə verməyən hər ağac kəsilir və oda atılır. ¹¹ Mən sizi tövbəniz üçün su ilə vəftiz edirəm, amma məndən sonra Gələn məndən daha qüdrətlidir. Mən Onun çarıqlarını daşımağa belə, layiq deyiləm. O sizi Müqəddəs Ruhla və odla vəftiz edəcək. ¹² Onun kürəyi əlindədir və xırmanını sovuracaq, Öz taxılını anbara toplayacaq. Küləşi isə sönməz odda yandıracaq».

 ¹³ O vaxt İsa Yəhya tərəfindən vəftiz olmaq üçün Qalileyadan İordan çayına, Yəhyanın yanına gəldi. ¹⁴ Yəhya Ona mane olmaq istəyərək dedi: «Sən Məni vəftiz etməlisən, Sən niyə mənim yanıma gəlirsən?» ¹⁵ İsa ona cavab verdi: «Hələlik buna razı ol. Çünki biz salehlik işini beləcə yerinə yetirməliyik». Onda Yəhya razı oldu. ¹⁶ İsa vəftiz olunan kimi sudan çıxdı. O vaxt göylər yarıldı və Tanrıın Ruhunun göyərçin kimi endiyini və Öz üzərinə qonduğunu gördü. ¹⁷ Göylərdən bir səda gəldi: «Bu Mənim sevimli Oğlumdur, Ondan razıyam».

Yəhya 1:29-34

 ²⁹ Ertəsi gün Yəhya İsanın ona tərəf gəldiyini görüb dedi: «Dünyanın günahını aradan götürən Allah Quzusu budur! ³⁰ “Məndən sonra bir Şəxs gəlir ki, məndən üstündür, çünki məndən əvvəl var idi” deyib haqqında danışdığım Kəs budur. ³¹ Özüm Onu tanımırdım, amma Onun İsrailə zahir olması üçün mən su ilə vəftiz edərək gəldim». ³² Yəhya şəhadət edib dedi: «Gördüm ki, Ruh göydən göyərçin kimi endi və Onun üzərində qaldı. ³³ Özüm Onu tanımırdım, lakin su ilə vəftiz etmək üçün məni göndərənin Özü mənə dedi: “Ruhun kimin üzərinə enib qaldığını görsən, bil ki, Müqəddəs Ruhla vəftiz edən Odur”. ³⁴ Mən də görüb “Allahın Oğlu budur” deyə şəhadət etmişəm».

Sorular:

• Vəftizçi Yəhya Tanrıdan hansı tapşırığı almışdı?

• Vəftizçi Yəhya özündən sonra gələn insan haqqında nə dedi? (Matta 3:11)?

• Vəftizçi Yəhya İsa Məsih haqqında başqa nələr dedi?

• Tövbə bizə nə gətirəcək? Tövbə etməliyikmi?